काठमाडौँ– काठमाडौँका प्रमुख जिल्ला अधिकारी कालिप्रसाद पराजुलीले निषेधाज्ञाका क्रममा पनि बजार अनुगमन प्रभावकारी रुपमा भएको दाबी गरेका छन् ।

संचार केन्द्र नेपालले शुक्रबार काठमाडौँमा गरेको बजार अनुगमनको अवस्था र सुशासन विषयक अन्तरक्रियामा पराजुलीले निषेधाज्ञाका क्रममा पनि बजार अनुगमन भएको र कारबाही पनि गरिएको बताए । उनले बजार अनुगमनमा कसैको दवाव र प्रभाव नपरेको बताए । स्वास्थ्य मापदण्डका साथ खोजिएका बजारमा पनि निरन्तर अनुगमन गरेको उनले बताए । उनले कालाबजारी गर्नेलाई कडा कारवाही गर्ने स्पष्ट पारे ।

त्यस्तै आपूर्ति तथा उपभोक्ता हकहित संरक्षण विभागका महानिर्देशक प्रकाश पौडेलले सीमित स्रोत र साधनको बाबजुत पनि विभागले निरन्तर अनुगमन गरिरहेको बताए । चाडपर्वमा अलि बढी अनुगमन गरेको देखिएपनि विभाग अन्य समयमा पनि सक्रिय रहेको र उपभोक्ताको अधिकार स्थापित गर्न गम्भीर रहेको धारणा राखे ।

राष्ट्रिय उपभोक्ता मञ्चका अध्यक्ष प्रेमलाल महर्जनले कालाबजारीलाई प्रशासनले संरक्षण गरेसम्म कालाबजारी नरोकिने बताए ।

उनले बजार अनुगमनको अधिकार स्थानीय तहलाई दिँदा अनुगमनको प्रभाव कम हुने जिकिर गरे ।