काठमाडौँ– एमाले विवाद समाधानका लागि गठन भएको कार्यदलको बैठक शुरु भएको छ । आन्तरिक छलफलका लागि भन्दै आज दिउँसो स्थगित भएको बैठक ‘अन्तिम टुंगो’ लगाउँदै भन्दै केहीबेर अघि फेरि शुरु भएको छ ।

सिंहदबारमा केहीबेरअघि शुरु भएको बैठकमा अध्यक्ष केपी शर्मा ओली समूहबाट नेता सुवासचन्द्र नेम्वाङसहित सचीव प्रदिप ज्ञवाली, स्थायी कमिटी सदस्य शंकर पोखरेल र बिष्णु रिमाल सहभागी छन् ।

वरिष्ठ नेता नेपाल समूहबाट भने उपाध्यक्ष भिम रावलसहित उपमहासचिव घनश्याम भुसाल, सचीव गोकर्ण बिष्ट, स्थायी कमिटीका सदस्य सुरेन्द्र पाण्डे, र रघुजी पन्त र भिम आचार्य सहभागी छन् ।

उपमहासचिव बिष्णु पौडेल मन्त्रिपरिषदको बैठकमा सहभागी भइरहेकाले नआएको तर केहीबेरमा आउने जनाइएको छ ।

७ बजेका लागि बैठक बोलाइएको भए पनि झण्डै आधा घण्टा ढिलो गरी बैठक शुरु भएको हो । दिउँसोको बैठकपछि कार्यदलका सदस्यहरूले आज बेलुकीसम्ममा विवादित विषयमा टुंगोमा पुग्ने बताएका थिए ।

सिंहदरबारमा बिहीबार दिउँसो बसेको बैठकमा विवादित बिषयमा समाधान खोज्न सकारात्मक छलफल भएको र आजै टुङ्गिने विश्वास नेताहरुले गरेका थिए ।

त्यस्तै एमालेको माधव नेपाल पक्षका कार्यदल सदस्य गोकर्ण विष्टले छलफल सहमतिको विन्दुमा पुगेको बताएका थिए ।

विष्टले आजको बैठकमा हिजोभन्दा धेरै प्रगति भएको बताउँदै लगभग सहमतिको विन्दुमा पुगेको जानकारी दिए । उनले भने, ‘कार्यदलमा विवादित विषयमा गम्भीर छलफल भएको छ, लगभग सहमतिको विन्दुमा पुगेको छ ।’

दिउँसोको बैठकपछि दुवै पक्षका कार्यदल सदस्यहरु आन्तरिक छलफलमा जुटेका थिए ।