काठमाडौँ– कोरोना संक्रणका कारण रोकिएको राष्ट्रिय जनगणना २०७८ आगामी १ असोजदेखि १५ असोजसम्म हुने गरि प्रस्ताव गरिएको छ।

केन्द्रीय तथ्यांक विभागले जनगणना सम्पन्न हुने पर्ने गरी तोकिएको समयभन्दा धेरै पर सार्न नहुने गरी जनगणनाको मुलगणना १ असोजदेखि १५ असोजसम्म गर्न प्रस्ताव गरेको हो ।

२०७८ असार ८ मा सम्पन्न हुनुपर्ने जनगणनालाई धेरै पर सार्न नहुने विभागको भनाइ छ ।

केन्द्रीय तथ्यांक विभागका निर्देशक ढुण्डीराज लामिछानेका अनुसार जनगणनाको मिति तोक्ने काम मन्त्रिपरिषद्ले गर्ने छ । ‘सम्भवतः एक साता भित्र नयाँ मिति घोषणा हुन्छ,’ उनले भने । उनका अनुसार वर्षायाम शुरु नभएको अवस्थामा जेठ अन्तिम सातादेखि असार पहिलोसाता भित्र नेपालमा जनगणना हुँदै आएको छ ।

यसरी हुने जनगणनाका दौरान नेपालको सबै भूभागमा गणक पुग्न सहज हुन्छ । तर, यो पटक कोरोना भाइरसको महामारीका कारण तोकिएको समयमा जनगणना हुन सकेन ।

तर, अहिले महामारी केही कम भएको भन्दै विभागले साउनबाटै तयारी थाल्ने भएको छ । ‘मूल गणना १ असोजबाट थालेर १५ दिनसम्म चलाउने तयारी भएको लामिछानेले बताए । उनले सम्भवतः एक साता भित्रै सरकारले मिति तोक्ने बताए ।