काठमाडौँ– साउथ अष्ट्रेलियाको बहुसांस्कृतिक तथा जातजाति मामिला आयोगको सदस्यमा नेपाली चेली मञ्जु खड्का नियुक्त भएकी छन् ।

जुलाई १ तारिखमा साउथ अष्ट्रेलियन सरकारले जारी गरेको घोषणा अनुसार एडिलेडकी सामाजिक अभियन्ता खड्का आयोगको सदस्यमा नियुक्त भएकी हुन् । एक आयुक्त र १४ सदस्य रहने उक्त आयोगले राज्यको बहुसांस्कृतिक समाज र जातजातिका बारेमा प्रिमियर तथा प्रिमियरको सहायकमन्त्रीलाई प्रतिवेदन बुझाउने काम गर्दछ । यो आयोगले साउथ अष्ट्रेलिया राज्यका जातजातिको विविधतालाई प्रवर्द्धन गर्ने तथा बहुसांस्कृतिक समुदायका हकहित र मामिलाका बारेमा सरकार तथा अन्य सार्वजनिक निकायलाई सुझाव दिने काम गर्दछ ।

जुलाई १ तारिखदेखि नियुक्त भएका आयोगका पदाधिकारीहरुको कार्यकाल तीन वर्षको हुनेछ ।

आयोगको पदाधिकारीका लागि साउथ अष्ट्रेलियन सरकारले बहुसांस्कृतिक समुदायका मानिसहरुबाट खुला आवेदन माग गरेको थियो । आवेदकको पृष्ठभूमि, उनीहरुले समाजमा पुर्‍याएको योगदान तथा व्यक्तित्व मूल्यांकन गरेर सदस्यमा नियुक्त गरिएको हो ।

नेपाली समाजको प्रतिनिधित्व गर्दै आयोगमा नियुक्त हुन पाउँदा गर्व लागेको खड्काले प्रतिक्रिया दिएकी छन् ।

नारी निकुञ्ज साउथ अष्ट्रेलियाकी संयोजक समेत रहेकी खड्काले सामाजिक सेवामा आफूलाई समपर्ण गर्दै आएकी छन् । नेपालमा १५ वर्षसम्म विभिन्न सामाजिक संघसंस्थामार्फत महिला शसक्तिकरणमा जुटेकी खड्का अष्ट्रेलिया पुगेर समेत सामाजिक कार्यमा सक्रिय छिन् ।

एक छोराकी आमा खड्क पेशाले रजिष्टर्ड नर्सका रुपमा समेत कार्यरत छिन् ।