विराटनगर– विराटनगरको बाल सुधार गृहबाट चार जना किशोरहरू भागेका छन् । बालबिझ्याँइका मुद्दामा सजायँ पाएका र पुर्पक्षका लागि अदालतले उनीहरुलाई सुधार गृहमा पठाएको थियो ।

शुक्रबार राति सुधार गृहको तीन तल्ला माथिबाट हाम्फालेर उनीहरु भागेको प्रहरीको अनुमान छ ।

बाल सुधार गृहबाट भागेकामध्ये तीन जना जबरजस्ती करणीको मुद्दामा सजाँय पाएका र एक जना हातहतियार खरखजनाको मुद्दामा पुर्पक्षमा रहेका बाल सुधार गृह विराटनगरका इन्चार्ज मिलन चौहानले जानकारी दिए ।

जबरजस्ती करणी मुद्दाका किशोरहरू १८, १९ २० वर्षका छन् । उनीहरुलाई क्रमश ७, ५ र १२ वर्ष कैद सजायँ भएको थियो ।

खरखजनाको मुद्दामा पुर्पक्षका लागि राखिएका किशोर १७ वर्षका हुन् । भागेकाहरुको घर झापा, उदयपुर, संखुवासभा र सोलुखुम्बु रहेको प्रहरीले जनाएको छ ।