कपिलवस्तु- कपिलवस्तु नगरपालिका–८ का विजयबहादुर कुर्मीको हत्यामा संलग्न रहेको आरोपमा प्रहरीले तीन जनालाई पक्राउ गरेको छ ।

प्रहरीका अनुसार पक्राउ पर्नेमा स्थानीय ३२ वर्षीय रमेश कहार, भाइ अनिल कहार र उनकी श्रीमती बास्मती कहार रहेका छन् ।

१८ वर्षीय कुर्मीको शव गत असार ७ गते कपिलवस्तु ८ पुर्व डिह बेलौहवास्थित पोखरीमा फेला परेको थियो।

जिल्ला प्रहरी कार्यालय कपिलवस्तुका डीएसपी धर्मराज भण्डारीका अनुसार यही असार ३ गते छिमेकीको विवाहमा गएका अनिल कहार ४ गते विहान घर फर्किँदा कुर्मीलाई आफ्नो कोठामा देखेपछि आक्रोशित उनले भाइ रमेश र श्रीमती बास्मतीको मिलेमतोमा कुटपिट गरी हत्या गरेर पोखरीमा फालिदिएको अनुसन्धानबाट खुलेको छ ।

कुर्मीले बास्मतीसँग शारीरिक सम्बन्ध राखेको भन्दै १ महिना पहिले पनि अनिलले कुटपिट गरेका थिए । अहिले पक्राउ परेका तीनै जनालाई अदालतबाट म्याद थप गरी अनुसन्धान भइरहेको प्रहरीले जनाएको छ ।