काठमाडौं– काठमाडौं महानगरपालिकाकी उपमेयर हरिप्रभा खड्कीले विकास बजेट व्याजमा लगाएको आफूले पनि समाचारहरु सार्वजनिक भएपछि मात्र थाहा पाएको बताएकी छिन् ।

नेपाली कांग्रेसले आजबाट शुरु गरेको जागरण अभियान अन्तर्गत काठमाडौंमा आयोजित कार्यक्रममा बोल्दै उपमेयर खड्गीले समाचारहरु सार्वजनिक भएपछि आफूले विकास बजेट व्याजमा लगाएको बारे सोधपुछ गरेको बताइन् ।

‘हाम्रो विकास बजेट तीन महिना भइसकेको रहेछ फिक्स डिपोजिटमा रहेको रहेछ’ उनले भनिन्,‘यस्तो गर्न मिल्दैन म एक्लै भएपनि डगमगाएको छैन । म एक्लै लड्छु सडकमा आउँछु ।’

उपमेयर खड्कीले मेयर विद्यासुन्दर शाक्य संस्कारी नभएको आरोप लगाइन् । उनले आफू राजनीतिक संस्कारबाट हुर्किएको बताइन् ।

महानगरपालिकाले विकासका लागि खर्च गर्नुपर्ने रकम व्याजका लागि मुद्दती खातामा राखेको समाचार केही समय अघि सार्वजनिक भएको थियो ।

आन्तरिक स्रातबाट एक अर्ब भन्दा धेरै रकम महानगरपालिकाले बैंकमा मुद्दति निक्षेपमा रहेको हो । महानगरले ९.५ प्रतिशत व्याजका लागि विकास बजेट बैंकमा रहेको हो ।