अमेरिकाको कोलोराडो राज्यको डेनभर शहर नजिक रहेको एक विद्यालयमा दुई विद्यार्थीले गोली चलाउँदा सोही विद्यालयमा पढ्ने एक विद्यार्थीको ज्यान गएको छ ।

डेनभर शहरनजिक रहेको हाइल्याण्ड्स रान्च शहरको स्टेम स्कूलमा गोली चलेको हो । घटनामा अरु ७ जना घाइते भएका छन् ।

अन्तर्राष्ट्रिय सञ्चारमाध्यमका अनुसार मंगलबार स्थानीय समयअनुसार २ बजे दुई बन्दुकधारीले विद्यालय हाताभित्र प्रवेश गरी जथाभावी गोली चलाउन शुरु गरेका थिए ।

उनीहरुले कसलाई लक्षित गरी गोली चलाएको हुन् भन्ने स्पष्ट नभइसकेको र दुई संदिग्ध बन्दुकधारीलाई गिरफ्तार गरिएको जनाइएको छ । गोली चलाउनुको कारणबारे अनुसन्धान भइरहेको प्रहरीले जनाएको छ ।

अमेरिकामा नियमितजसो विद्यालयमा गोली चल्ने गरेका छन् । अमेरिकी सञ्चारमाध्यमका अनुसार वर्ष सन् २०१९ मा विद्यालयमा भएको यो १ सय १५ औं गोलीकाण्ड हो ।