काठमाडौं– सिन्धुपाल्चोकको मेलम्चीका बाढी प्रभावितलाई राहत प्रदान गर्न नेपाली फिल्म क्षेत्रका कलाकारहरु एकजुट भएका छन् । उनीहरु मेलम्ची नै पुगेर पीडितलाई राहत प्रदान गरिरहेका छन् ।

यही क्रममा कतिपय सेलिब्रेटीले गाडीको प्रयोग गरेका छन् भने कतिपयले हेलिकप्टरमार्फत राहतको सामाग्री पुर्‍याएका छन् ।

अभिनेत्री श्वेता खड्का र उनको सामाजिक समूह शुक्रबार प्रभु हेलिकोप्टरबाट हेलम्बुलगायत सिन्धुपाल्चोकका बाढीग्रस्त ठाउँ पुगे । खाद्यन्न र लुगाफाटोसहितका सहायता लिएर उनीहरुको टोली हेलम्बु, तिम्बु, चनौटे र तारामराङ गएको थियो ।

बाढीपहिरो गएपछि फेसबुकमा उनले चलाएको राहत संकलन अभियानबाट प्राप्त सहयोग र आफ्नो केही सहयोग लिएर उनी त्यहाँ पुगेकी हुन् । श्वेताले सिन्धुपाल्चोकमै भूकम्प पीडित माझीका लागि माझी बस्ती बनाएकी थिइन् ।

यस्तै अभिनेत्री आँचल शर्मा र उनका टिमले पनि सिन्धुपाल्चोक पुगेर सहयोग गरेको छ । आँचलसँगै निर्देशक मिलन चाम्स, वसन्त निरौला, कलाकार रितेश चाम्स, ओएसआर डिजिटलका प्रमुख ओम अग्रवाल लगायतको टिमले सहयोग वितरण गरेको थियो ।

हाँस्य कलाकार कुमार कट्टेलले आफ्नो कलाकार समूह लिएर सिन्धुपाल्चोक पुगी राहत प्रदान गरेका छन् । कुमारसहित जयराम सिग्देल, मधुसुदन पाठक, अशोक धिताल, गोपाल लामालगायतले ३० बोरा चामल, ३४ वटा ब्ल्याङ्केटलगायत अन्य सामाग्री बाढीपीडितलाई दिएका थिए । अभिनेत्री पूजा शर्मा, कलाकार राज कटवालको टोली पनि सिन्धुपाल्चोकको मेलम्ची पुगेर राहत प्रदान गरेको थियो ।