काठमाडौँ– मेगा बैंक नेपालले फोनबाटै तत्कालै प्राप्त गर्न सकिने कर्जा सुविधा ल्याएको छ।

आवश्यक रकम तत्कालै उपलब्ध गराउने उद्देश्यले सो सुविधा ल्याएको हो। कर्जा सुविधाका लागि बैंकले एफ वन सफ्ट इन्टरनेसनलसँग सहकार्य गरेको छ।

यस सुविधामार्फत बैंकमा आफ्नो मासिक तलब खाता भएका विभिन्न संघ संस्था तथा कम्पनीका कर्मचारीहरुले ३० दिनसम्मका लागि अधिकतम २ लाख रुपैयाँ झिक्न सक्नेछन्।

बिना धितो बैंकमा उपस्थित नभई तत्कालै फोन मार्फत कर्जा पाइने भएकाले छिटो र सहज हुने बैंकका डिजिटल तथा इ–बैंकिङ प्रमुख विश्व सिंहले बताए।

मेगा स्मार्ट बैंकिङ एपमार्फत अनलाईन आवेदन दिएको केही मिनेटमै ग्राहकलाई ‘भर्चुअल क्रेडिट कार्ड’ मार्फत खातामा कर्जा रकम जम्मा गरिनेछ।

कर्जाको लागि आवश्यक सम्पूर्ण प्रक्रिया अनलाईन मार्फत पुरा भएको अवस्थामा बैंकले तुरुन्त कर्जा प्रवाह गर्ने जनाएको छ।