पोखरा– गण्डकी प्रदेशका मुख्यमन्त्री कृष्णचन्द्र नेपाली पोखरेल बाढीले पुर्‍याएको क्षतिको अवलोकन गर्न आज मनाङ पुगेका छन् ।

मनाङका विभिन्न ठाउँमा बाढीपहिरोले पुर्‍याएको क्षतिको अवलोकन गर्न मुख्यमन्त्रीसहितको टोली हेलिकोप्टरबाट मनाङ् गएको हो । प्रदेश सरकारका प्रवक्ता खड्कासहित मुख्यमन्त्री पोखरेल मनाङ पुगेका छन् ।

बाढीपहिरोले गण्डकी प्रदेशको मनाङ्मा सबैभन्दा बढी क्षति पुर्‍याएको छ । बाढीपहिरोले मनाङ जिल्लाको चामे, नासो र ङिस्याङ गाउँपालिकामा ठूलो क्षति पुर्‍याएको छ ।

बाढीपहिरोका कारण जिल्लाका तीन स्थानीय तहका २ सय घरका एक हजार भन्दा बढी नागरिक विस्थापित भएका छन् । बाढीले अस्थायी प्रहरी चौकीसहित सरकारी कार्यालयहरु र बैंक रहेको भवनहरुसमेत बगाएको छ ।

मनाङ पुगेर मुख्यमन्त्री पोखरेलले प्रमुख जिल्ला अधिकारी विष्णु लामिछानेसँग छलफल गरी बाढीपहिरो प्रभावित क्षेत्र पुगेका छन् ।

यसैबीच, गण्डकी प्रदेश सरकारले प्रदेशस्तरीय विपद् कोषमा तत्कालका लागि ५ करोड रुपैयाँ राख्ने निर्णय गरेको छ । गण्डकी प्रदेशका मुख्यमन्त्री पोखरेलको अध्यक्षतामा आज बिहान बसेको प्रदेशस्तरीय विपद् व्यवस्थापन कार्यकारी समितिको बैठकले ५ करोड रुपैयाँ कोषमा राख्ने निर्णय गरेको हो ।

साथै बैठकले मुख्यमन्त्री पोखरेलले सुरक्षा निकायलाई उद्धार तथा सहयोगमा जुट्न निर्देशन दिएको छ ।