फ्रान्सको फुटबल क्लब नान्टेसले कार्डिफसिटीसँग इमिलियानो सालाको सरुवा रकम माग गरेको छ । नान्टेसले कार्डिफसँग १५ मिलियन पाउन्ड माग गरेका बीबीसीले उल्लेख गरेको छ ।

अर्जेन्टिनाका फरवार्ड साला र पाइलट डेभिड इबोट्सन पाइपर सवार मलिबु एनन २६४डीबी विमान दुर्घटना भएपछि जनवरी २१ देखि वेपत्ता छन् ।

जनवरी २१ मा च्यानल आइसल्यान्डमा वेपत्ता भएको बिमान केही दिन अघि दुर्घटनाग्रस्त अवस्थामा भेटिएको थियो । २८ वर्षे सालालाई कार्डिफले किर्तिमानी रकममा भित्र्याएको थियो । तर, क्लबका लागि भने उनले खेल्न पाएनन् ।

फ्रान्सको पत्रिकासँगको अन्तरर्वार्तामा कार्डिफका अध्यक्ष मेहमेत दालमानले नान्टेसलाई लक्षित गर्दै भनेका छन् कि नान्टेसले पहिलो किस्ता माग गरेको बताए । उनले पहिलो किसता स्वरुप ६ मिलियन युरो मागेको बताएका छन् । “हामी परिवार प्रति सम्मान गर्न चाहान्छौं । परिवार दुर्घटनाबाट पीडामा रहेको छ,” अध्यक्ष दालमेनले भने ।

बिहीबार राती बिमान दुर्घटना अनुसन्धान शाखा (एएआईबी) ले बिमानका सबै भग्नावशेष भेटिएको जानकारी दिइसकेको छ । कार्डिफले दुर्घटनामा परेका सालाको उद्दार हुन नपाउँदै नान्टेसले गरेको मागप्रति आश्चर्य जनाएको छ ।

नान्टेसले १० दिनभित्र पैसा नदिए कानुनी उपचार खोज्ने धम्की समेत दिएको दालमेनले बताए ।