काठमाडौँ- कप्तान लियोनल मेस्सीले उत्कृष्ट प्रदर्शन गरे पनि फिफा विश्वकप छनोटमा अर्जेन्टिना बराबरीमा रोकिएको छ ।

दक्षिण अमेरिकी छनोट अन्तर्गत बुधबार भएको खेलमा अर्जेन्टिना कोलम्बियासँग २-२ गोलको बराबरीमा रोकिएको हो ।

कोलम्बियाविरुद्ध सुरुवाती ८ मिनेटमा दुई गोलको अग्रता लिएको अर्जेन्टिना त्यसलाई जोगाउन नसक्दा अंक बाढ्न बाध्य भयो ।

खेलको तेस्रो मिनेटमा क्रिस्टियन रोमेरोले गोल गर्दै अर्जेन्टिनालाई अग्रता दिलाएका थिए । आठौँ मिनेटमा लिन्ड्रो डानिल पारेडेसले गोल गर्दै अर्जेन्टिनालाई २-० को अग्रता दिलाए ।

तर, खेलेको ५१ मिनेटमा लुइस मुरीएलले पेनाल्टीमा गोल गर्दै कोलम्बियालाई २-१ को स्थितिमा ल्याए । त्यसपछि खेलको इन्जुरी समयमा मिगुएल बोर्जाले गोल गर्दै कोलम्बियालाई २-२ गोलको बराबरीमा फर्काए ।

यस बराबरीसँगै अर्जेन्टिनाले ६ खेलमा १२ अंक जोड्दै तालिकाको दोस्रो स्थानमा छ । कोलम्बिया ६ खेलमा ८ अंक जोडेर पाँचौं स्थानमा रहेको छ ।