काठमाडौँ– निषेधाज्ञाको उल्लंघन गरेको आरोपमा कोटेश्वरस्थित भाटभटेनी डिपार्टमेन्ट स्टोरका म्यानेजर सागर गुरुङ पक्राउ परेका छन् ।

निषेधाज्ञाको उल्लंघन गर्दै दिउँसोको समयमा डिपार्टमेन्ट स्टोर खोलेको आरोपमा प्रहरीले गुरुङलाई पक्राउ गरेको हो ।

निषेधाज्ञाको समयमा बिहान ९ बजेसम्म मात्र डिपार्टमेन्ट स्टोरको ग्रोसरी कक्ष खोल्न पाइने व्यवस्था भए पनि दिउँसो खुला राखेकाले गुरुङलाई पक्राउ गरिएको काठमाडौँका प्रमुख जिल्ला अधिकारी कालीप्रसाद पराजुलीले बताए ।

काठमाडौँका सहायक प्रमुख जिल्ला अधिकारी उमाकान्त अधिकारी नेतृत्वको टोली अनुगमनका क्रममा पुग्दा दिउँसो पनि डिपार्टमेन्ट स्टोर खुला राखेको भेटेको थियो ।

दिउँसो पनि खुला राखेको सूचना पाएपछि सहायक प्रजिअको टोली अनुगमनका लागि त्यहाँ पुगेको थियो ।