दोहा- कतारबाट नेपाल फर्किने यात्रुले कोरोना बिरुद्धको दुबै डोज खोप लगाइसकेको भए पनि ५ दिन अनिवार्य होटेल क्वारेन्टाइनमा बस्नुपर्ने भएको छ ।

कतारस्थित नेपाली दूतावासले आइतबार एक सूचना जारी गर्दै यसबारे जानकारी दिएको हो ।

दूतावासका अनुसार आजदेखि दोहा र काठमाण्डौबीच नेपाल एयरलाइन्स र कतार एयरवेजका एक/एक उडान हुँदैछन् ।

ती उडानबाट जाने नेपाली तथा विदेशी नागरिकहरुले पालना गर्नुपर्ने मापदण्ड ख्याल गर्न दूतावासले अनुरोध गरेको छ ।

कस्ता छन् मापदण्ड ?

– ७२ घण्टाभित्रको कोभिड १९ नेगेटिभ पीसीआर रिपोर्ट ।

– ५ दिन अनिवार्य होटल क्वारेन्टिन बस्नुपर्ने ।

– क्वारेन्टिन बसेको चौथो दिनमा पीसीआर परीक्षण गर्ने र पोजेटिभ रिपोर्ट आएमा थप १० दिन होम क्वारेन्टिन बस्नुपर्ने ।

दूतावासका अनुसार आफन्तको अन्तिम संस्कार  (काजक्रिया) मा सहभागी हुन नेपाल जाने व्यक्ति, दीर्घरोगी वा शारिरीक रुपमा अशक्त बिरामी र सँगै जाने कुरुवा, ७५ वर्षमाथिका ज्येष्ठ नागरिक वा ५ वर्ष मुनिका नाबालक र सँगै आउने नाबालकका आमाबुबाको हकमा स्थानीय तहको सिफारिसको आधारमा १० दिन होम क्वारेन्टिन बस्ने गरी गन्तव्यमा जान अनुमति दिइने व्यवस्था गरिएको छ ।

यसका लागि टिकट खरीद, क्वारेन्टिनका लागि होटल बुकिङ गर्ने प्रक्रिया तथा अन्य जानकारीका लागि सम्बन्धित एयरलाइन्ससँग सम्पर्क गर्न समेत दूतावासले अनुरोध गरेको छ ।

कतारमा उडान बन्द हुनु अगाबै टिकट लिएर बसेका, करार अवधि सकिएर स्वदेश फर्कने क्रममा रहेका, भिजिट भिसाको म्याद सकिएका, विभिन्न कारणले रोजगारी गुमाएका बसेका नेपाली बढी समस्यामा रहेका छन् ।