काठमाडौं– नेपाली राष्ट्रिय महिला फुटबल टोलीकी स्ट्राईकर सावित्रा भण्डारी ‘साम्बा’ ले भारतीय महिला लिग फुटबल प्रतियोगिताको डेब्यू खेलमै ह्याट्रिक गरेकी छन् ।

सेथु एफसीबाट खेलेकी सावित्राले ४ गोल गरेकी छन् । उनले मनिपुर पुलिस स्पोर्ट्स क्लबविरुद्ध ४ गोल गर्दा उनको टोली सेथु ६–४ गोल अन्तरले विजयी भएको छ ।

सावित्राले खेलको पहिलो हाफमै तीन गोल गर्दै ह्याट्रिक गरेकी थिइन् । पहिलो मिनेटको २८ औं सेकेन्डमा गोल गर्दै टोलीलाई अग्रता दिलाएकी सावित्राले १६ औं मिनेटमा दोस्रो र ३४ आंै मिनेटमा तेस्रो गोल गर्दै ह्याट्रिक पूरा गरिन् ।

सेथुका लागि खेलको ६५ र ७५ औं मिनेटमा दिग्माई ग्रेसले थप दुई गोल गरेकी थिइन् । विजयी टोली सेथुले अंक तालिकामा ३ अंक जोडेको छ ।

पराजित मनिपुरका लागि नाङ्गोम बालादेबीले खेलको २२ तथा ४२ औं मिनेट र खेलको अन्तिम समयमा गोल गर्दै ह्याट्रिक पूरा गरिन् । यस्तै, मनिपुरका लागि चौथो गोल सलाम प्रमोदिनी चानुले गरे पनि टोलीलाई जित दिलाउन भने सकिनन् ।