काठमाडौँ– नवनियुक्त महिला, बालबालिका तथा ज्येष्ठ नागरिक मन्त्री चन्दा चौधरीले समाजमा रहेका कुरीति अन्त्यका लागि पाँच वर्षे रणनीतिक कार्ययोजनालाई अघि बढाउने बताएकी छन् ।

आइतबार सिंहदरबारमा पदभार ग्रहणका क्रममा मन्त्री चौधरीले पाँच वर्षे रणनीतिक कार्ययोजनासम्बन्धी फाइल सदर गर्दै प्रदेश र स्थानीयका साथै संघीय सरकारको संयुक्त पहलमा समाजमा रहेका कुरीति अन्त्य गरिने बताएकी हुन् । मन्त्री चौधरीले अझै पनि समाजमा बालविवाह, दाइजो जस्ता कुरीति रहेको र सबै मिलेर यस्ता कुरीतिलाई अन्त्य गर्नुपर्ने धारणा राखिन् ।

उनले सामाजिक सुरक्षा योजना मुलुकका सबै क्षेत्रमा समान रुपमा पुग्न नसकेको भन्दै यस विषयलाई छिटो भन्दा छिटो समाधान गर्ने दाबी गरिन् ।

मन्त्रालयमा धेरै कार्ययोजनाहरू कार्यान्वयन नै नहुने अवस्थालाई अन्त्य गर्नका लागि प्राथमिकताका आधारमा योजनालाई अघि बढाइने उनले जानकारी दिइन् ।

आइतबार नै महिला, बालबालिका तथा ज्येष्ठ नागरिक राज्यमन्त्री रेणुका गुरुङले पनि पदभार ग्रहण गरेकी छन् ।