काठमाडौँ– राउटे युवतीमाथि दुर्व्यवहार गर्नेलाई कानुन बमोजिम कडा कारबाही गर्न नेपाल आदिवासी जनजाति महासंघले माग गरेको छ ।

आइतबार विज्ञप्ति जारी गर्दै महासंघले होटल सञ्चालक र दुर्व्यवहार गर्ने व्यक्तिहरूलाई कारबाही गर्न माग गरेको हो ।

‘राउटे समुदायका दुई युवतीहरुमाथि भएको यौन दुर्व्यवहार सम्बन्धमा नेपालका सम्पूर्ण आदिवासीहरूको साझा संस्था नेपाल आदिवासी जनजाति महासंघको गम्भीर ध्यानाकर्षण भएको छ ।’ विज्ञप्तिमा उल्लेख छ ।

जुनसुकै हिंसा मानवअधिकार विरोधी कार्य भएको र यौन हिंसा चरम मानव अपराध भएको महासंघले उल्लेख गरेको छ ।

मञ्जुरी विना तस्वीर तथा भिडियो खिच्ने, गलत नियतले राउटे युवतीलाई होटलमा ल्याउने, मादक पदार्थ सेवन गराउने र यौन दुर्व्यवहार गर्ने जस्ता कार्यहरु घृणित मानवता विरोधी र अक्षम्य कार्य भएको महासंघले जनाएको छ ।