काठमाडौँ– नेपालको लोकप्रिय एप्लिकेशन नेपाली पात्रोले मौसम विवरणको जानकारी, कुण्डली र रेडियो सेवा शुरु गरेको छ । कम्पनीले प्रयोगकर्तालाई अझ सजिलो र सुविधाका लागि सो सेवा शुरु गरेको जनाएको हो ।

अब नेपाली पात्रोका प्रयोगकर्ताले आफ्नो मोबाइलमा नेपालको जुनसुकै स्थानीय तहको स्थान सेट गरी त्यस स्थानको ४८ घण्टे मौसम विवरण एपमार्फत मार्फत लिन सक्नेछन् । भने १ हप्ताको मौसम विवरण समेत अगावै लिन सक्ने जनाइएको छ ।

यससँगै प्रयोगकर्ताले आफ्नो जन्म मिति तथा स्थान प्रदान गरी सजिलै कुण्डली बनाउन सक्नेछन् । जसअनुसार प्रयोगकर्ताले आफ्नो साढेसाती, दशा, महादशा, अन्तर्दशा, प्रत्यन्तरदशा तथा अरु अन्य दशाको बारेमा थाहा पाउन सक्नेछन् । साथै ज्योतिष सेवाको परामर्श लिन चाहेमा प्रयोगकर्ताले नेपाली पात्रोका विशेषज्ञबाट परामर्श लिन सक्नेछन् ।

नेपाली पात्रो एपकै सबैभन्दा लोकप्रिय समाचार पढ्न सकिने फिचरलाई अझ सबिधायुक्त बनाउनका लागि कम्पनीले समाचार पाठकहरुमा रेडियो पनि सुन्न मिल्ने सुबिधा थप गरेको छ । नेपाली पात्रो अडियोमा रेडियो नेपाल, रेडियो सिटी साथै करिब १ दर्जन विभिन्न रेडियो समावेश गरिएको छ भने, भविष्यमा अझै धेरै रेडियो स्टेसन समावेश गर्ने नेपाली पात्रो टिमले जनाएको छ ।

यी सुविधाहरूको काम अन्तिम चरणमा पुगेको र जेठको अन्तिम हप्ताभित्र सबै प्रयोगकर्ताको मोबाइलमा अपडेट हुने जनाइएको छ ।