नवलपुर– पूर्वी नवलपरासीको देवचुली नगरपालिका २ केउरेनीस्थित चौधरी उद्योगको बियर प्लान्टमा बुधबार आगलागी भएको छ ।

बुधबार विहान ८ बजेदेखि लागेको आगो नियन्त्रणमा लिन आठ घण्टा भन्दा बढी समय लागेको जिल्ला प्रहरी कार्यालय नवलपुरका प्रवक्ता एवम् प्रहरी नायव उपरीक्षक दीलिपकुमार गिरीले बताए ।

उद्योगको बियरको बोटलिङ र गोदाममा पूर्ण रुपमा क्षति भएको उद्योगका प्रशासन प्रमुख दामोदर पौडेलले बताए । आगलागी नियन्त्रण गर्न कावासोती नगरपालिका तथा चितवनको भरतपुर तथा खैरहनी नगरपालिकाको ५ वटा दमकल तथा नेपाली सेना, प्रहरी, उद्योगका कर्मचारीहरु खटिएका थिए ।

उद्योगको आगलागी भएको भवनको भित्री भागमा अझै आगो हुन सक्ने भएकाले जेसिभीले भवन भत्काउने काम बुधबार बेलुकासम्म नै भएको थियो । तीन वटा एम्बुलेन्स रातिसम्म पनि उद्योगमै रहेको डिएसपी गिरीले जानकारी दिए ।

कैयौं उपकरणहरु एउटैको करोडौं पर्न सक्ने भएकाले कम्पनीबाट क्षतिको विवरण निकाल्न १०/१२ दिन लाग्ने जानकारी पाएको डिएसपी गिरीले बताए ।