काठमाडौँ– सामाजिक सञ्जालमार्फत स्वास्थ्यकर्मीको चरित्र हत्या गरेको आरोपमा प्रहरीले पर्साको वीरगञ्जबाट एकजनालाई पक्राउ गरेको छ ।

प्रहरीका अनुसार पक्राउ पर्नेमा वीरगञ्ज महानगरपालिका –१० घडिअर्वा बस्ने सौरभ साह छन् । जिल्ला प्रहरी कार्यालय पर्साका प्रवक्ता डीएसपी ओम प्रकाश खनालका अनुसार आफूलाई सञ्चारकर्मी तथा सामाजिक अभियन्ता बताउने साहले फेसबुक पेज र म्यासेन्जर मार्फत चरित्र हत्या गर्ने, धम्क्याउने लगायत कानून विपरीतका काम गरेको पाइएको हुँदा पक्राउ गरिएको हो ।

साहमाथि अहिले मुलुकी अपराध संहिता, २०७४ अन्तर्गत सार्वजनिक हित, स्वास्थ्य, सुरक्षा, सुविधा र नैतिकताविरुद्धको कसुरमा म्याद थप गरी अनुसन्धान भइरहेको प्रहरीले जनाएको छ ।