काठमाडौँ– सरकारले नेपाल एयरलाइन्ससहित चार वटा वायुसेवा कम्पनीलाई अन्तर्राष्ट्रिय नियमित उडानको अनुमति दिएको छ ।

नेपाल वायुसेवा निगम, टर्किस एयरलाइन्स, कतार एयरवेज र एयर इण्डियालाई नेपालमा उडानको अनुमति दिइएको हो ।

यसका लागि नेपाल नागरिक उड्डयन प्राधिकरणले उडान तालिका समेत स्वीकृत गरेको छ ।

सरकारले भारतमा दुई र अन्य तीन मुलुकमा साताको एक नियमित उडान खोलेको छ । अनुमति पाएका उडानमध्ये टर्कीले इस्तानबुलमा मात्र उडान गर्न पाउने छ ।

नेपाल एयरलाइन्सले कतारको दोहा र भारतको नयाँ दिल्लीका लागि अनुमति पाएको छ । दोहाका लागि कतार एयरवेजले समेत एक उडान पाएको छ । कतारमा नेपाल एयरलाइन्स र कतारले हरेक सोमबार उडान भर्ने जनाइएको छ ।

एयर इण्डियाले भने साताको शुक्रबार काठमाडौ उडान भर्ने गरी अनुमति पाएको छ ।