बुटवल– जिल्ला प्रहरी कार्यालय रुपन्देहीले ‘फरार प्रतिवादी अप्रेसन’ अन्तर्गत जघन्य अपराधका ५ जना फरार दोषीहरू पक्राउ गरेको छ ।

कर्तव्य ज्यान मुद्दाका तीन जना, जबर्जस्ती करणी मुद्दाका एक जना र अप्राकृतिक मैथुन मुद्दाका एक जना फरार अभियुक्तहरू एकै दिन पक्राउ परेको जिल्ला प्रहरी कार्यालयका प्रवक्ता प्रहरी नायव उपरीक्षक सत्यनारायण थापाले जानकारी दिए ।

कर्तव्य ज्यान मुद्दामा १० वर्ष कैद फैसला भएका तिलोत्तमा नगरपालिका–११ निवासी ५३ वर्षीय धनबहादुर बुढाथोकी, १४ वर्ष कैद फैसला भएका तिलोत्तमा नगरपालिका–१६ का कन्हैया कवर जोगी र १९ वर्ष ३ महिना कैद सजाए भएका गैडहवा–८ बस्ने बलु सुनार भन्ने वलवीर कुमार सुनार पक्राउ परेको प्रहरी कार्यालयले जनाएको छ ।

जबर्जस्ती करणी मुद्दामा ७ वर्ष कैद फैसला भएका तिलोत्तमा नगरपालिका–१६ का राजन चौधरी भन्ने वेनीराम कवर जोगी र अप्राकृतिक मैथुन मुद्दामा ४ वर्ष कैद सजाए भएका तिलोत्तमा नगरपालिका–२ का बाबुराम विक पनि पक्राउ परेका छन् ।

गत वैशाख १ गतेदेखि सञ्चालित फरार प्रतिवादी विरुद्धको अप्रेशन अन्तर्गत जघन्य अपराधमा संलग्न भई १० वर्षभन्दा बढी सजाय भएका फरार प्रतिवादीहरु हालसम्म १६ जना पक्राउ गरेको रुपन्देही प्रहरी कार्यालयले जनाएको छ ।