काठमाडौं– नेपाल कम्युनिस्ट पार्टी (नेकपा)को सचिवालय बैठक आज बस्दै छ । पार्टी एकीकरणका बाँकी कामलाई पूर्णता दिन सचिवालय बैठक बस्न लागेको हो ।

जिल्ला कमिटीहरुको एकीकरणको काम सकिएपनि जनसंगठन, नेताहरुको जिम्मेवारी बाँडफाँट, पोलिटव्यूरो गठन लगायतमा छलफल गर्न सचिवालय बैठक बोलाइएको हो ।

नेकपाका अध्यक्ष पुष्पकमल दाहाल‘प्रचण्ड’ ले आइतबार काठमाडौंमा आयोजित एक कार्यक्रममा पार्टी एकीकरणका बाँकी काम सक्न सोमबार केन्द्रीय सचिवालय बैठक बोलाइएको जानकारी दिए ।

उनले पार्टी एकीकरणको बाँकी काम पूरा हुनेवित्तिकै करीब ८ महिना भित्र जिल्ला अधिवेशनहरु सम्पन्न हुने बताए । उनले पार्टी एकताको सम्पूर्ण काम दुई दिनभित्रमा पूरा हुने दाबी गरे ।

यसअघि पार्टी स्थापना दिवसको अवसर पारेर नेकपाले ७७ जिल्लामा दुई पार्टीबीचको एकता घोषणा गरेको थियो ।

जसमा पूर्व एमालेको भागमा परेको जिल्लामा एमालेका जिल्ला अध्यक्ष नै एकीकृत पार्टीको अध्यक्ष हुने र पूर्व माओवादीका जिल्ला अध्यक्ष सचिव रहने गरि पार्टी एकता भएको थियो । त्यस्तै पूर्व माओवादी केन्द्रको भागमा परेको जिल्लामा पूर्व माओवादीका जिल्ला अध्यक्ष नै अध्यक्ष रहने र पूर्व एमालेका अध्यक्ष सचिव बनेका छन् । तर कतिपय जिल्लामा भने मर्यादाक्रम तल परेको भन्दै सचिव छानिएकाले शपथ लिन अस्वीकार गरेका थिए ।