काठमाडौँ– काठमाडौँ महानगरमा कोरोना संक्रमण दर क्रमश: घट्दो क्रममा गएको महानगरले जनाएको छ ।

अघिल्लो साता परीक्षण गरिएकामध्ये ७० प्रतिशतमाा संक्रमण पुष्टि भएकामा अहिले ५ प्रतिशत घटेर ६५ मा आएको महानगरले जनाएको छ।

विगत सातामा अत्यधिक कोरोना संक्रमित बढेपछि महानगरले गत शनिबादेखि स्वाब संकलनका लागि ५ वटा केन्द्र विस्तार गरी हरेक दिन १६ वटा स्थल तोकेर परीक्षणलाई तीव्र बनाएको छ ।

अहिले महानगरका ३२ वडाबाट मात्रै अहिले हरेक दिन ६०० जनाको परीक्षण हुने गरेको छ । महानगरपालिकाको जनस्वास्थ्य महाशाखाका ल्याब टेक्निसियन राधिका कुइँकेलका अनुसार परीक्षणका लागि आवश्यकताअनुरूप टोली तयारी अवस्थामा छ ।

परीक्षणका क्रममा बढी समस्या भएका बिरामीलाई एम्बुलेन्समा अस्पतालसम्म लैजाउन र ल्याउने व्यवस्थासम्म महानगरले नै गर्दै आएको छ । यसका लागि नागरिकले पैसा तिर्नुपर्दैन । महानगरले पोजेटिभ भएका बिरामी बोक्न एम्बुलेन्ससँग ३ साताअघि सम्झौता गरेअनुसार हाल ७ स्थानबाट नागरिकले सेवा प्राप्त गर्न सक्नेछन् ।

हालसम्म महानगरमा ५९ हजार ४४५ कोरोनाबाट संक्रमित भएका छन् । तीमध्ये ४७ हजार ९९७ निको भएका छन् । हाल ११ हजार ४३ सक्रिय संक्रमित छन् । सबैभन्दा बढी वडा नम्बर ३२ मा पाँच हजार ५४१, वडा नम्बर १६ मा ५ हजार ३५२ छन् भने सबैभन्दा कम वडा नम्बर १८ मा २५२ जनामा कोरोना पुष्टि भएको छ । संक्रमणकै कारण हालसम्म ४०५ जनाले ज्यान गुमाएका छन् ।

महानगरमा हाल रहेका संक्रमितमध्ये १० हजार ३६८ होम आइसोलेसनमा छन् भने १२८ जना संस्थागत आइसोलेसनमा र ५४६ ले अस्पतालमा उपचार गराइरहेका छन् ।