लसएञ्जल्स– हलिउडका प्रख्यात अभिनेता केविन क्लार्कको सडक दुर्घटनामा निधन भएको छ । केविनले ३२ वर्षको उमेरमा ज्यान गुमाएका हुन् ।

अमर उजालाका अनुसार केविनले साइकल चलाइरहदा त्यही समयमा उनलाई एक कारले हिर्काएको थियो । प्रहरी घटनास्थल पुग्दा केविन कारमुनि गम्भीर अवस्थामा भेटिएका थिए ।

प्रहरीले उनलाई त्यहाँबाट तुरुन्तै एडवोकेट इलिनोइस मेसोनिक मेडिकल सेन्टर पुर्याएको थियो । त्यहाँ पुर्‍याएकाे केही समयमा नै चिकित्सकले उनलाई मृत घोषणा गरेको थिए ।

केविनले सन् २००३ मा रिलिज फिल्म ‘स्कूल अफ रक’ मा ड्रमर फ्रेडी ‘स्पेजी मेगी’ जोन्सको भूमिका निभाएका थिए । उनको निधनमा कलाकारले श्रद्धाञ्जली दिएका छन् ।

अभिनेता ज्याक ब्ल्याकले आफ्नो इन्स्टाग्राममा ‘दुःख लाग्दो खबर, केविन गए, विश्वास नै लाग्न सकेको छैन’ भन्दै लेखेका छन् ।

केविन र ज्याक ‘स्कूल अफ रक’मा एकसाथ देखिएका थिए । यो फिल्ममा अभिनय गरेपछि केविनले ड्रम बजाउने कामलाई नियमित राखे । केविनले ‘जेस बेस एण्ड द इन्टेन्टेन्स’सँग काम गरेका थिए ।