पोखरा– गण्डकी प्रदेशसभाको बजेट अधिवेशन जेठ १६ गतेका लागि बोलाइएको छ ।

मंगलबार बसेको मन्त्रिपरिषदको बैठकले १६ गते दिउँसो १ बजे पोखरास्थित सभागृह हलमा अधिवेशन बोलाउनका लागि सिफारिस गरेको सरकारका प्रवक्ता रामशरण बस्नेतले जानकारी दिए ।

गण्डकी प्रदेशको सातौं अधिवेशन चैत २५ गतेबाट सुरु भई वैशाख २ गते अन्त्य गरिएको थियो । प्रदेश प्रमुख पृथ्वी सुब्बा गुरुङविरुद्ध अविश्वासको प्रस्ताव दर्ता गर्न लागिएपछि प्रदेश सरकारको सिफारिसमा तत्कालिन प्रदेश प्रमुख अमिक शेरचनले अधिवेशन मध्यरातमा अन्त्य गरेका थिए ।

अविश्वास प्रस्ताव दर्ता गर्दै कांग्रेससहितका विपक्षी दलहरुले विशेष अधिवेशन बोलाउन माग गरेपछि वैशाख १३ गते विशेष अधिवेशन शुरु भएको थियो ।

आगामी असार १ गते भित्र प्रदेश सरकारले बजेट ल्याउनु पर्ने भएकाले अधिवेशन डाकिएको हो ।

जेठ १६ गते बजेट अधिवेशन शुरु भएपछि दोस्रो दिन जेठ १७ गते विनियोजन विधियेक २०७८ को सिद्धान्त र प्राथमिकता प्रस्तुत गरिने गण्डकी प्रदेशका आर्थिक मामिला तथा योजना मन्त्री किरण गुरुङले जानकारी दिए । बजेट ल्याउनुअघि सरकारको नीति तथा कार्यक्रम प्रदेशसभाले पारित गर्नुपर्ने प्रावधान छ ।

गण्डकी प्रदेशका मुख्यमन्त्री गुरुङले आगामी जेठ २८ गते भित्र विश्वासको मत लिनुपर्नेछ ।

संविधानको धारा ६८ को ३ अनुसार ठूलो दलको हैसियतमा पुनः दोस्रो पटक मुख्यमन्त्री भएका गुरुङले एक महिनाभित्र विश्वासको मत लिनुपर्ने प्रावधान छ । गुरुङले दोस्रो पटक वैशाख २९ गते मुख्यमन्त्रीको सपथ लिएका थिए ।