मुम्बई– बलिउडका प्रख्यात निर्देशक सञ्जय लीला भन्साली हालका दिनमा एकपछि अर्को प्रोजेक्टमा व्यस्त छन् । केही दिन अघि सञ्जयले अभिनेता शाहरुख खानसँग फिल्म ‘इजहार’मा सहकार्य गर्ने चर्चा चलिरहँदा यी निर्देशक आफ्नो प्रिय अभिनेत्री दीपिका पादुकोणसँग ‘बैजू बावरा’का लागि कुराकानी गरिरहेका छन् ।

बलिउड लाइफका अनुसार फिल्मको चरित्रका लागि सञ्जय र दीपिकाबीच कैयौंपटक कुराकानी भइसकेको छ । सञ्जयको फिल्मका लागि दीपिकाले ग्रीन सिग्नल दिइन भने यो फिल्ममा दीपिकाले सन् १९५२ की डाकु रानी रुपमतीको भूमिका निभाउनेछिन् । सञ्जय र दीपिका दुवैले फिल्मको चरित्रको बारेमा चर्चा गरेका छन् ।

दीपिकालाई फिल्ममा अनुबन्धका लागि केही कागजी प्रक्रिया बाँकी रहेको छ । केही बुँदामा दुवै पक्षबीच सहमति भएपछि कामको सम्झौता हुनेछ ।

‘भन्साली हाल ‘गंगूबाई काठियावाडी’को सम्पादन र पोस्ट प्रोडक्सनको काम गरिरहेका छन् । त्यही स्थानमा ‘बैजू बावरा’को टिम स–सानो काम गरिरहेका छन् । दीपिकाले सहमति जनाउनासाथ अन्य कलाकारको लागि कुराकानी अगाडि बढ्नेछन् ।’, फिल्म सम्बद्ध स्रोतले भनेको छ ।

फिल्मको सुटिङ आगामी वर्षको मध्यबाट सुरु हुनेछ । दीपिका र सञ्जयले यसअघि ‘गोलियों की रासलीलाः राम–लीला’, ‘बाजीराव मस्तानी’ र ‘पद्मावत’ जस्ता फिल्ममा सहकार्य गरिसकेका छन् ।