काठमाडौँ– राष्ट्रिय प्रजातन्त्र पार्टीका अध्यक्ष कमल थापाले संविधानको धारा ७६ को उपधारा (५) ले दलीय अनुशासन तोड्ने अनुमति दिएको हो भन्दै प्रश्न गरेका छन् ।

थापाले सामाजिक सञ्जाल फेसबुकमा विद्वानहरू समक्ष सानो जिज्ञासा भन्दै संविधानको धारा ७६ (५) ले सांसदहरूलाई निर्दलीय बन्न छुट दिएको हो ? भनेर प्रश्न राखेका छन् ।

उनले यो मान्यतालाई स्वीकार गर्ने हो भने दल फुटाउने र सांसद किनबेच गर्ने काम वैधानिक हुने भन्दै चिन्ता व्यक्त गरेका छन् । थापाले क्षणिक स्वार्थलाई मात्र नहेर्न सबै दलका नेतालाई आग्रह पनि गरेका छन् ।

उनले लेखेका छन्, ‘विद्वानहरू समक्ष सानो जिज्ञासा: के संविधानको धारा ७६(५)ले सांसदहरूलाई निर्दलीय बन्न छुट दिएको हो ? दलीय अनुशासन विपरित जाने स्वतन्त्रता दिएको हो ? यदि यो मान्यता स्विकार गर्ने हो भने दल फुटाउने र सांसद किनबेच गर्ने काम वैधानिक हुन्छ । कुनै दल सुरक्षित रहन्न् । क्षणिक स्वार्थ मात्र नहेरौं।’