मुम्बई – सलमान खान पछिल्लो समय फिल्म ‘भारत’ का कारण चर्चामा छन् । लामो समयदेखि दर्शक उनको फिल्मको प्रतीक्षामा छन् । यो मात्र होइन, सलमानका फ्यान ‘टाइगर जिन्दा है’ को सिक्वेलको पनि पर्खाइमा छन् ।

निर्देशक अली अब्बास जफरले फिल्म ‘भारत’ को काम सकिएपछि सलमान खानलाई लिएर ‘टाइगर जिन्दा है’ को सिक्वेल बनाउने बताएका छन् । ‘भारत’ मा पनि उनकै निर्देशन छ । यो फिल्ममा सलमान खानको अपोजिटमा क्याटरीना कैफ छिन् ।

सलमान खान स्टारर फिल्म ‘एक था टाइगर’ र ‘टाइगर जिन्दा है’ मा पनि सलमान र क्याटरीनाको जोडी दर्शकले देख्न पाएका थिए ।

निर्देशक अली अब्बास जफरले भनेका छन्, ‘मेरा लागि सबैभन्दा पहिले जरुरी काम कथा खोज्नु हो, म एकदमै खुशी छु, किनकि मैले फिल्मका लागि कथा भेट्याइसकेको छु, यो कहानी टाइगर जिन्दा है को सिक्वेल हो ।’

उनका अनुसार उक्त कथा गज्जबको छ । यसअघिका दुई फिल्म सुपरहिट भएकाले पनि दर्शकलाई ‘टाइगर जिन्दा है’ को कहानीमा विशेष रुचि छ ।

सलमान खानको फिल्म ‘भारत’ ईदको मौका पारेर रिलिज हुँदैछ भने डिसेम्बरमा ‘दबंग ३’ रिलिज हुनेछ ।