रोल्पा– रोल्पामा ठूलो परिमाणमा आधुनिक हतियारको म्याग्जिन र गोली बरामद भएको छ । त्रिबेणी गाउँपालिका ३ रामपुरस्थित सामुदायिक वन नजिकै रहेको बास घारीमा प्लास्टिकमा पोको पारी बासको पातले छोपेर लुकाई राखेको अवस्थामा सुरक्षा निकायले ठूलो परिमाणमा अत्याधुनिक हतियारका म्याग्जिन र गोली बरामद गरेको हो ।

रोल्पा प्रहरी प्रमुख नरेशराज सुवेदीका अनुसार एसएमजी म्याग्जिन २३ थान, एम १६ को म्याग्जिन १ थान, एलएमजी म्याग्जिन १ थान बरामद भएको हो । त्यसैगरि एके ४७ को गोली ७ सय ५२ थान, ७.६२ मिमिको गोली २ सय ८ राउन्ड र ९ एमएमको गोली १० राउन्ड गरि ९ सय ७० राउन्ड गोली बरामद भएको छ ।

उक्त स्थानमा हतियार रहेको गोप्य सूचना रोल्पास्थित बटुक दल गणले प्राप्त गरेपछि सेना हुँदै जिल्लाको सुरक्षा निकायसम्म खबर पुगेको थियो । सेनाका अनुसार दक्षिण रोल्पाको दहबनस्थित रहेको बटुक दलको गुल्मसम्म गोप्य सूचना आएको थियो । ‘हामी कहाँ सूचना आएको थियो । त्यहि आधारमा हामीले हतियार बरामद गरेका हौ,’ बटुक दलका गणपती अरुण श्रेष्ठले भने, ‘यो विषयमा थप अनुसन्धान हुँदैछ ।’

रोल्पा प्रहरी प्रमुख नरेशराज सुवेदीले बरामद गरिएका हतियार धेरै पुरानो नभएर नयाँ जस्तो देखिएको बताएका छन् । रोल्पामा पटक पटक ठूलो परिमाणमा हतियार बरामद हुने गरेको छ ।