काठमाडौँ– नेकपा(एमाले)की नेतृ रामकुमारी झाँक्रीले प्रधानमन्त्रीको सिफारिशमा राष्ट्रपतिले संसद भंग गरी चुनाव घोषणा गर्नुलाई सत्ताको अपराधिकरण भएको टिप्पणी गरेकी छन् ।

उनले सामाजिक सञ्जालमा आफ्नो धारणा राख्दै मुलुकलाई अहिले चुनाव नचाहिएको बताएकी हुन् । उनले मुलुक एउटा अँध्यारो युगमा प्रवेश गरेको बताउँदै आफूहरुले अन्तिम समयसम्म संसदलाई जोगाउन चाहेको भए पनि खराब नियतका मान्छेहरुको षड्यन्त्रसामू आफूहरुको केही नलागेको बताएकी छन् ।

उनले कोरोना महामारीको कारण जनताहरु छटपटिरहेको बेला त्यसको व्यवस्थापनमा नगर्नु र जनताले ज्यान गुमाउनुलाई सत्ताको अपराधीकरण भएको बताउँदै अहिलेको आवश्यकता चुनाव नभएको बताइन् ।

उनले सामाजिक सञ्जालमा लेखेकी छन्, ‘ एउटा अँध्यारो युगको सुरूवात ! हामी अन्तिम समयसम्म संसद जोगाउन चाहान्थ्यौँ। खराब नियतिका मान्छेहरूको षड्यन्त्रको सामु केही लागेन । यस्तो डरलाग्दो महामारीमा जनता खोप, अस्पताल, औषधि, वेड, अक्सिजन, ICU, Ventilator नपाएर छटपटाई छटपटाई दैनिक दुई सय भन्दा बढीले ज्यान गुमाउनु परेको छ। यो सत्ताको अपराधिकरण हो। यस्तो बेला चाहिएको छ महाराज महारानीलाई चुनाव? जनताले हिसाबकिताब त पक्कै राख्नेछन् ।’