काठमाडौँ– सत्ता समीकरणमा निर्णायक मानिएको जनता समाजवादी पार्टी आन्तरिक विवादका कारण फुटको संघारमा पुगेको छ ।

अध्यक्ष महन्थ ठाकुर र नेता राजेन्द्र महतो खेमाले बुधबार प्रधानमन्त्री केपी ओली भेटेपछि र आफूहरू आधिकारिक भन्दै राष्ट्रपति विद्यादेवी भण्डारीलाई पत्र बुझाएपछि विवाद झनै चर्किएको हो ।

ठाकुर-महतोले गठबन्धन सरकारमा सामेल नहुने भन्दै ओली सरकारकै निरन्तरतालाई सुनिश्चित गर्न खोजेपछि बाबुराम भट्टराई-उपेन्द्र यादव समूहले कारवाहीको चेतावनी दिएको छ । र, जसपाकै सहयोगले मात्र गठबन्धन सरकार बन्ने सम्भावना पनि अब लगभग टरेको छ ।

दुई धारमा विभाजित जपसाको ठाकुर-महतो समूह कांग्रेस–माओवादीले पहल गरेको गठबन्धन सरकारमा सहभागी नहुने अडानमा छ ।

फागुन २३ मा सर्वोच्च अदालतले एमाले र माओवादीलाई पूर्ववत् अवस्थामा फर्काएपछि वैकल्पिक सरकारबारे निर्णय लिन नसक्दा जसपा दुई धारमा विभाजित भएको थियो ।