काठमाडौँ– चीनमा जनसंख्या वृद्धिदर प्रत्येक वर्ष घट्दै गएको छ । यसपटकको तथ्यांक अनुसार चीनको जनसंख्या वृद्धिदर केही दशक यताकै कम देखिएको छ।

चीन सरकारले मंगलबार जारी गरेको नयाँ तथ्यांक अनुसार गएको १० वर्षमा औषतमा वार्षिक जनसंख्या वृद्धिदर ०.५३ प्रतिशत देखिएको छ।

सन् २०००–२०१० को दशकमा यो दर ०.५७ प्रतिशत थियो। जनगणनाको नयाँ तथ्यांक अनुसार चीनको जनसंख्या एक अर्ब ४१ करोडभन्दा बढि पुगेको छ।

तथ्यांकमा जनसंख्या वृद्धिदर थप कम देखिएपछि दम्पतीहरुलाई बच्चा जन्माउन प्रेरित गर्ने खालका नयाँ योजना ल्याउन चीन सरकारमाथि दबाब परेको छ।

सन् २०२० को अन्त्य तिर गरिएको गणनाको प्रतिवेदन गएको अप्रिलमै सार्वजनिक गर्ने तयारी थियो। सन् १९७९ मा चीनले जनसंख्या वृद्धि नियन्त्रण गर्न एक सन्तान नीति लागु गरेको थियो।

त्यसको प्रभाव अहिलेसम्म पर्दा जनसंख्या वृद्धिदर निकै कम देखिएको हो। सन् २०१६ मा चीन सरकारले एक सन्तान नीति बन्द गरिसकेको छ ।