काठमाडौँ- जनता समाजवादी पार्टी नेपालका अध्यक्ष महन्थ ठाकुर र वरिष्ठ नेता राजेन्द्र महतो काँग्रेस सभापति शेरबहादुर देउवा निवास बुढानिलकण्ठ पुगेका छन् ।

प्रधानमन्त्री केपी शर्मा ओलीले सोमबार विश्वासको मत लिन लागिरहँदा ठाकुर र महतो देउवालाई भेट्न बूढानीलकण्ठ पुगेका हुन् ।

प्रधानमन्त्री ओलीको विश्वास मतको पक्षमा रहेका भनिएका अध्यक्ष ठाकुर पक्षधरले देउवासँग वैशाख २७ गतेपछिको राजनीतिक सहकार्य प्रष्टता खोजेको एक नेताले बताएका छन् ।

जसपाभित्र प्रधानमन्त्री ओलीको विश्वासको मत दिने नदिने भन्नेमा विवाद छ । संघीय परिषद अध्यक्ष डा.बाबुराम भट्टराई र अध्यक्ष उपेन्द्र यादव प्रधानमन्त्री ओलीको विपक्षमा छन् भने अध्यक्ष ठाकुर पक्षमा छन् ।

ओलीलाई विश्वासको मत प्राप्त नहुने अवस्था आएमा जसपाको ठाकुर पक्षधरहरू तटस्थ बस्ने तयारीमा रहेको निकट स्रोतले जनाएको छ । ओलीले विश्वासको मत लिने तयारी गरेसँगै देउवासँग अरू राजनीतिक दलका नेताहरूको भेटवार्ता बाक्लिएको छ ।

देउवालाई उनकै निवासमा पुगेर प्रधानमन्त्री ओली, एमालेकै नेता माधव कुमार नेपाल, माओवादी केन्द्रका अध्यक्ष पुष्पकमल दाहाल, जसपाकै नेता उपेन्द्र यादव लगायतले भेटेका छन् ।