काठमाडौं– राष्ट्रपति विद्यादेवी भण्डारीले दोहोरो अंकको आर्थिक वृद्धिदरका लागि आधार तयार भएको बताएकी छन् ।

शुक्रबार संघीय संसदको संयुक्त वैठकलाई सम्बोधन गर्दै राष्ट्रपति भण्डारीले अघिल्ला २ वर्ष ६ प्रतिशतले आर्थिक वृद्धि भएको र चालू आर्थिक वर्षमा समेत ७ प्रतिशतको आर्थिक वृद्धिदरले दोहोरो अंकको आर्थिक वृद्धिदर हासिल गर्ने आधार बनेको बताइन् ।

राष्ट्रपति भण्डारीले राष्ट्रिय बचत २७ प्रतिशतले वृद्धि भइ पूँजी निर्माणको राष्ट्रिय आधार तयार भएको पनि बताइन् ।

सरकारले हालै आयोजना गरेको लगानी सम्मेलनमा विभिन्न क्षेत्रका परियोजनामा लगानी गर्ने समझदारी हुनुले नेपाल महत्वपूर्ण लगानी गन्तव्य भएको सन्देश प्रवाहित भएको पनि राष्ट्रपतिले बताइन् ।