काठमाडौं– संचार तथा सूचना प्रविधिमन्त्री गोकुलप्रसाद बाँस्कोटाले संचार माध्यमहरूले बाटो बिराएको टिप्पणी गरेका छन् ।

मन्त्री बाँस्कोटाले लोकतान्त्रिक मूल्य र मान्यता स्थापित गराउने आन्दोलनको अगुवाई गरेको कम्युनिष्ट पार्टी नेतृत्वको सरकारलाई समेत लोकतन्त्रविरोधी देखाउने प्रयास सञ्चारमाध्यमहरुले गरिएको भन्दै गुनासो गरे ।

विश्व प्रेस स्वतन्त्रता दिवसको अवसर पारेर शुक्रबार काठमाडौंमा आयोजित एक कार्यक्रममा बोल्दै मन्त्री बाँस्कोटाले संविधानले पूर्ण प्रेस स्वतन्ताको प्रत्याभूति गरेको उल्लेख गर्दै त्यसको प्रयोगमा संकुचन वा कमजोर बनाउने काम हुनै नसक्ने दोहोर्‍याए ।

नागरिक स्वतन्त्रता र प्रेस स्वतन्त्रता नेपालको इतिहास, भूगोल, खुलापनका कारण पनि संकुचन हुँनै नसक्ने मन्त्री बाँस्कोटाको तर्क छ । मन्त्री बाँस्कोटाले संविधानको मूलभूत मान्यताभन्दा बाहिर गएर कानून बनाउने आशंका नगर्नसबैलाई आग्रह गरे । सरकार लोकतन्त्रको विश्वव्यापी मान्यतामा एकाकार र सहमत भएर अघि बढ्न प्रतिवद्ध रहेको मन्त्री बाँस्कोटाको भनाइ थियो ।

कार्यक्रममा बोल्दै नेपाल पत्रकार महासंघका अध्यक्ष गोविन्द आचार्यले प्रेशमैत्री कानून निर्माण गर्न सरकारको गम्भिर ध्यानाकर्षण गराए । प्र्रेस स्वतन्त्रता सुनिश्चित गर्नु आज पनि चुनौतिको रुपमा रहेको उनको भनाइ थियो ।