दोहा- रोजगारीको लागि नेपाली श्रमिकहरुको प्रमुख गन्तब्य रहेको कतारमा केही दिनयता कोरोना संक्रमणदर घट्दै गएको छ ।

बुधबार ६९० जनामा देखिएको संक्रमण बिहीबार घटेर ६८७ पुगेको थियो ।

पछिल्लो २४ घण्टामा ६७६ जनामा संक्रमण पुष्टी भएको छ भने १ हजार ५९३ जना निको भएको कतारको स्वास्थ्य मन्त्रालयले जनाएको छ ।

यस्तै त्यहाँ एकै दिन थप ८ जनाको मृत्यु भएको छ । मन्त्रालयका अनुसार ३३, ४४, ५०, ५६, ७७, ५७, ६१ र ७७ बर्षीय नागरिकको मृत्यु भएको जनाएको छ । योसंगै कतारमा कोरोना संक्रमणबाट मृत्यु हुनेको सङ्ख्या ४५८ पुगेको छ  ।

कतारमा कोरोना संक्रमितको संख्या २ लाख ५ हजार ६५२ जना पुगेको छ । उपचारपछि निको हुनेको संख्या १ लाख ८९ हजार ५४४ रहेको मन्त्रालयले जनाएको छ।

कतारमा अहिले १५ हजार ६५२ वटा ‘एक्टिभ’ केस रहेका छन् । जसमध्ये ८४९ जना यहाँको विभिन्न अस्पतालहरुमा उपचाररत छन् । त्यसमध्ये ३७४ जनाको आईसीयूमा उपचार भैरहेको छ । कतारले सुरुवाती दिनदेखि नै संक्रमितको राष्ट्रियतबारे खुलाएको छैन् ।

अहिलेसम्म कोरोनाबाट कतारमा २१ नेपाली श्रमिकले ज्यान गुमाईसकेका छन् । यो समाचार तयार पार्दासम्म १५ लाख ५६ हजार २०३ जनाले कोरोना बिरुद्धको खोप लगाईसकेको मन्त्रालयले जनाएको छ ।

३३९ जनालाई कारबाही

कोभिड–१९ रोकथामका लागि सरकारले जारी गरेको सावधानीका उपायहरू उल्लंघन गर्ने ३३९ जनालाई कारबाही गरिएको छ ।

आन्तरिक मन्त्रालयका अनुसार ३१० जनालाई सार्वजनिक रूपमा मास्क नलगाएकोमा, १ जनालाई मोबाइलमा एहतेराज एप्स प्रयोग नगरेकोमा, २२ जनालाई सामाजिक दूरी कायम नगरेकोमा र बाँकी ६ जनालाई क्वारेनटाइन अवधि बाँकी हुँदै भागेकोमा कारबाही गरिएको जनाएको छ ।

भाइरस संक्रमणको नयाँ लहर सुरु भएसंगै कतार सरकारले थप प्रतिबन्ध लगाउदै भाइरसबाट बच्न अपनाउनुपर्ने स्वास्थ्य सतर्कताका नयाँ मापदण्ड जारी गरि थप कडाइ गरिरहेको छ ।

अहिलेसम्म सावधानीका उपायहरू उलङ्घन गर्ने हजारौं व्यक्तिलाई कारबाही गरिसकिएको मन्त्रालयले जनाएको छ ।

नियम उल्लंघन गरेको पाइएमा दुई लाख कतारी रियाल जरिवाना र तीन वर्षसम्म कैद सजाय तोकिएको छ ।