काठमाडौँ– राष्ट्रिय जनमोर्चा पार्टी गण्डकी प्रदेशका सांसद खिमविक्रम शाहीले आफूमाथि गरिएका टिकाटिप्णीको खण्डन गरेका छन् ।

बुधबार गण्डकी प्रदेश सभामा उपस्थित नभई अस्पताल भर्ना भएका सांसद शाहीले आफू पार्टीको निर्णयमा प्रतिवद्ध रहेको स्पष्ट पारेका छन् ।

पोखराको चरक अस्पतालको आइसीयूमा उपचाररत सांसद शाहीले आज एक पत्र लेख्दै आफू एकाएक बेहोस भई उपचारको लागि गएको र अहिले क्रमिक सुधार भएको समेत बताएका छन् ।

‘म सदनमा जाने भनि तयारी अवस्थामा रहेका बेला अचानक बिरामी भई मेरो आफ्नै भाइलाई सम्पर्क गरेर आफ्नो स्वास्थ्य उपचारको लागि अस्पताल लैजाने क्रममा म बेहोस भएछु,’ उनले लेखेको पत्रमा लेखेका छन्, ‘म थप स्वस्थ भएपछि मेरो बारेमा उठेका उठेका कैयौँ प्रश्नको बारेमा प्रष्ट गर्ने नै छु ।’

त्यस्तै गण्डकी प्रदेश सरकारलाई दिएको समर्थन फिर्ता लिने विषयमा आफ्नो सहमति रहेको बताउँदै पार्टीको निर्णयप्रति प्रतिवद्ध रहेको जनाएका छन् ।

‘पार्टीको निर्णय र संसदीय दलको बैठकमा गरिएको निर्णयमा मेरो पनि सहभागिता रहेको कारण ती निर्णयहरुप्रति मेरो पनि सहमति रहेकाले त्यस विषयमा पार्टीको निर्णप्रति प्रतिवद्ध कायमै छ ।’ उनले भनेका छन् ।

गण्डकी प्रदेश सरकार जोगाउने वा हटाउनेमा निर्णायक मानिएको राष्ट्रिय जनमोर्चाका सांसद एकाएक हराएसँगै बुधवारको बैठक स्थिगत भएको थियो ।

बागलुङ क्षेत्र नं. २ ‘ख’ बाट निर्वाचित सांसद शाहीले समाचार र सामाजिक सन्जालमा प्रचार भएका भ्रमपूर्ण खबरका आधारमा धारणा नबनाउन आग्रह समेत गरेका छन्।

उनले स्वास्थ्य अवस्था सुधारोन्मुख रहेको पनि बताएका छन्।

यस्तो छ पत्र