सप्तरी– निर्माण कार्यमा संलग्न एक मजदुरको माटोको ढिस्कोले पुरिएर ज्यान गएको छ । राजविराज नगरपालिकाद्वारा वडा–७ स्थित हटिया (हाट बजार)मा निर्माण भईरहेको सपिङ्ग कम्पलेक्स निर्माण कार्यमा खटिएको सुनसरी जिल्ला शिवगन्ज गाउँपालिका–८ का २८ वर्षिय अरसद अलिको बिहीवार माटोको ढिस्कोले पुरिएर ज्यान गएको हो ।

बिहान १० बजेतिर निर्माण स्थलमा खनिएको गहिरो खाडल भित्र काम गर्दै गर्दा अचानक ढिस्कोले पुरिएर उनको ज्यान गएको प्रहरीले जनाएको छ । ढिस्कोले पुरिएर गम्भिर घाइते भएका उनको प्रहरीले उद्धार गरी उपचारका लागि धरानस्थित बीपी कोइराला स्वास्थ्य विज्ञान प्रतिष्ठान लैजाँदै गर्दा बीचबाटोमै मृत्यु भएको प्रहरी उपरीक्षक राजेन्द्र विष्टले बताए ।

उक्त कार्यको रसुवा रोशन जेभी निर्माण कम्पनीले ठेक्का लिएको छ । जोखिमपूर्ण अवस्थामा मजदुर अलीलाई काममा लगाएको भन्दै आक्रोशित मजदुरहरुले  क्षतिपूर्तिको माग गरेका छन् ।