पोखरा– गण्डकी प्रदेशसभाको विशेष अधिवेशनको दोस्रो दिनको बैठकमा सत्ता पक्षले नै अवरोध गरी स्थगित भएको संसद बैठक बुधबार सञ्चालन हुने भएको छ ।

मंगलबार बैठक शुरू भएलगत्तै सत्तारुढ दल नेकपा एमालेका सांसदले पीसीआर परीक्षण गर्न माग गर्दै बैठक अवरुद्ध गरेको थिए ।

एमालेका सांसदहरु आफ्नो स्थानमा उठेर निरन्तर विरोध जनाएपछि सभामुखले २० मिनेटका लागि बैठक स्थगित गरेका थिए ।

प्रदेशसभा बैठक रोकेर बोलाइएको कार्यव्यवस्था परामर्श समितिको बैठक बसेको थियो । कार्यव्यवस्था परामर्श समितिको बैठकमा सबै सांसदहरुको पीसीआर परीक्षण गरी सदन चलाउने सहमति जुटेपछि बैठक बुधबार दिउँसो १ बजेसम्मका लागि स्थगित गरिएको थियो ।

सांसदहरुको पीसीआर परीक्षण गरी बैठक चलाउने सहमति भएको प्रदेशसभा सदस्य कृष्णबहादुर थापाले बताए ।

कुनै प्रदेशसभा सांसदलाई संक्रमण देखिएमा पनि संसद बैठक नरोक्ने सहमति भएको छ । कोरोना संक्रमण देखिएको अवस्थामा त्यस्तो सांसदलाई निजी सवारी साधनमा आएर प्रदेशसभामा अविश्वास प्रस्तावमाथिको मतदानमा भाग लिन दिइने सहमति भएको छ ।

संसदको विशेष अधिवेशनमा गण्डकी प्रदेशका मुख्यमन्त्री पृथ्वीसुब्बा गुरुङविरुद्ध अविश्वासको प्रस्ताव पेश भएको थियो ।