काठमाडौं–पश्चिम रुकुमको आठबीसकोट नगरपालिकाकोे क्षेत्रभित्र रहेका सामुदायिक तथा संस्थागत विद्यालयहरु एक साताका लागि बन्द हुने भएका छन् । नगरपालिकाले सोमबार विज्ञप्ति जारी गरी वैशाख १४ गतेदेखि २० गतेसम्म विद्यालय बन्द गर्ने निर्णय गरेको हो ।

कोरोना संक्रमण बढ्न थालेका कारण विद्यालय बन्द गर्ने निर्णय भएको नगरपालिकाले जनाएको छ । विद्यार्थीहरुलाई घरमा बसेर परीक्षाको तयार गर्न निर्देशन दिँदै नगरपालिकाले विद्यालय बन्द गरेको हो ।

नगरपालिकाद्वारा जारी विज्ञप्तिमा विद्यार्थीहरुलाई भीडभाडमा नजान, बिरामी भएका व्यक्तिको सम्पर्कबाट टाढा रहन र विदेशबाट आएका मानिसहरुको सम्पर्कबाट टाढा रहनलगायत स्वास्थ्य सुरक्षाको मापदण्ड पालना गरेर घरमै बसी परीक्षाको तयारी गर्न भनिएको छ ।

वैकल्पिक प्रणालीबाट शिक्षण सिकाई क्रियाकलापको सुनिश्चितता गरी विद्यालयको प्रत्यक्ष पठनपाठनलाई एक साताको लागि बन्द गर्न नगरपालिकाले विद्यालयलाई अनुरोध गरेको छ ।

त्यस्तै शिक्षक कर्मचारीहरु भने दैनिक रुपमा विद्यालय उपस्थित भई विद्यालयको प्रशासनिक तथा परीक्षा सम्बन्धी तयारी गर्न अनुरोध गरिएको छ ।