काठमाडौँ– रुपेन्देहीको तिलोत्तमा नगरपालिकामा रहेका प्यारामाउन्ट स्कुलमा अध्ययनरत छात्राको मृत्यु भएको छ ।

ज्वरो, रुघाखोजी लागेर बिरामी भएकी उनको उपचारका क्रममा मृत्यु भएपछि नगरपालिकाले अर्को सूचना जारी नभएसम्मका लागि सबै शैक्षिक संस्था बन्द गर्न आग्रह गरेको छ ।

उनको स्वाव परीक्षणका लागि पठाए पनि कोरोना संक्रमण भए नभएको भने पुष्टि भएको छैन ।

कक्षा १० मा अध्ययनरत उनी प्यारामाउन्ट बोर्डिङ स्कुलको होस्टलमा बस्दै आएकी थिइन ।

छात्रालाई शुक्रबारदेखि ज्वोरो, रुघाखोकी लागेको विद्यालयले जानकारी गराएको नगरपालिकाको शिक्षा विभागका प्रमुख गंगाराम आचार्यले बताए । उनले घटनाका बारेमा बु्झ्दै गरेको र सबै शैक्षिक संस्था बन्द गर्न भनिएको बताएका छन् ।

बिरामी भएकी उनलाई शनिबार आफन्तले नजिकैको अस्पताल लगेका थिए। अस्पताल पुर्याइएको केही बेरमा चिकित्सकले उनलाई मृत घोषणा गरेका थिए ।

बालबालिका तथा युवा अवस्थाका व्यक्ति बढी जोखिममा परेको भन्दै आइतबार बसेको नगरपालिका स्तरीय कोभिड–१९ संकट व्यवस्थापन केन्द्र(सीसीएमसी) को बैठकले विद्यालय बन्द गर्ने निर्णय गरेको हो ।

आजकै मितिदेखि लागु हुनेगरी नगरभित्रका सम्पूर्ण शैक्षिक संस्थाहरु र परीक्षा अर्को निर्णय नहुँदासम्म लागि बन्द गर्ने निर्णय भएको आचार्यले बताए ।

नगरपालिकाले विद्यालयसँगै हाटबजार पनि अर्का सूचना नआएसम्मको लागि बन्द गर्ने निर्णय गरेको छ ।

मठमन्दिर गुम्बा लगायत धार्मिक स्थलहरुमा मानिसको जमघट हुनेगरी कुनै पनि कार्यक्रम नगर्ने र वित्तिय संस्था, सहकारी, पसल र होटल व्यवसाय सञ्चालन गर्दा जनस्वास्थ्यका आवश्यक मापदण्डलाई पूर्ण रुपमा पालना गर्न नगरपालिकाले आग्रह गरेको छ ।

त्यस्तै विवाह, व्रतवन्ध जस्ता क्रियाकलाप गर्दा आवश्यक भौतिक दुरी र स्वास्थ्य सुरक्षालाई ध्यानमा राख्नुपर्ने नगरपालिकाको भनाइ छ ।