रुपन्देही– लुम्बिनी प्रदेशका भौतिक पूर्वाधार विकासमन्त्री सन्तोष पाण्डेलाई आफ्नै पार्टीका नेता तथा कार्यकर्ताले कालो झण्डा देखाएका छन् । मन्त्री पाण्डेलाई रुपन्देहीमा उनकै पार्टी जसपाका कार्यकर्ताले विरोधस्वरुप कालो झण्डा देखाएका हुन् ।

लुम्बिनी प्रदेशमा कांग्रेस, माओवादी र जसपा मिलेर मुख्यमन्त्री शंकर पोखरेलविरुद्ध अविश्वास प्रस्ताव दर्ता गराए पनि अन्तिम समयमा जसपाका चार सांसदले पोखरेललाई साथ दिएका थिए ।

अहिले ती चारैजनालाई मन्त्री बनाइएको छ । पाण्डे तिनैमध्येका एक हुन् । अविश्वास प्रस्तावमा हस्ताक्षर गरेको दुई घण्टामै निर्णय बदलेर उनी लुम्बिनी प्रदेश सरकारको भौतिक पूर्वाधार विकासमन्त्री बनेका छन् ।

मन्त्री पाण्डेलाई मर्यादपुर, मझगावा र गोनहियालगायतका स्थानमा जनता समाजवादी पार्टीकै नेता–कार्यकर्ताले सडकमा अवरोध गरेका थिए । मन्त्री पाण्डेलाई पदलोलुप, व्यक्तिवादी, अनैतिक र धोकेबाज भन्दै उनीहरुले नाराबाजी गरेका थिए ।

जसपा रुपन्देहीका अध्यक्ष रामअवतार यादव, पूर्वसांसद ओमप्रकाश यादव, केन्द्रीय परिषद सदस्य रुपा मल्ल, केन्द्रीय सदस्य उमाशंकर यादवलगायत विरोधमा उत्रिएका थिए । प्रहरीले बल प्रयोग गरेर मन्त्रीलाई गन्तव्यतर्फ पुर्‍याएको थियो ।