लण्डन– चिनियाँ दूरसञ्चार कम्पनी हुवावेबारे सूचना चुहाएको भन्दै बेलायती प्रधानमन्त्री टेरिजा मेले रक्षामन्त्री गेभिन विलियमसनलाई बर्खास्त गरेकी छिन् ।

प्रधानमन्त्री मेले पत्र लेख्दै विलियमसनप्रति आफ्नो र बेलायती मन्त्रिपरिषद्को विश्वास नरहेको भन्दै उनलाई मन्त्रिपरिषद्मा राख्न नसकिने जनाएकी हुन् ।

बेलायतमा पाँचौ पुस्ताको मोबाइल इन्टरनेट ‘फाइभजी’ निर्माण गर्न चिनियाँ कम्पनी हुवावेलाई अनुमति दिने निर्णय बाहिर ल्याउनुमा उनको भूमिका रहेको भन्ने आरोप लागेपछि उनी विवादमा तानिएका थिए ।

गत अप्रिल २३ मा भएको राष्ट्रिय सुरक्षा परिषद्को बैठकमा हुवावेलाई बेलायतमा फाइभजी मोबाइल इन्टरनेट निर्माण गर्न दिने निर्णय भएको गोप्य सूचना बेलायतको अखबार डेली टेलिग्राफले बाहिर ल्याएको थियो ।

त्यसबाहेक बेलायतका विपक्षी दलका सांसद्हरुले विलियमसनविरुद्ध आपराधिक अभियोगमा प्रहरीले अनुसन्धान गर्नुपर्ने माग राखेका छन् ।

विलियमसनले भने आफूलाई बलिको बोको बनाइएको र आफूले कुनै गोप्य सूचना नचुहाएको दाबी गरेका छन् । विलियमसनले आफू र राष्ट्रिय सुरक्षा सल्लाहकार मार्क सेडविलको सम्बन्ध राम्रो नभएकाले पनि आफूविरुद्ध षड्यन्त्र भएको हुनसक्ने जनाएका छन् ।