काठमाडौं – आउँदो जेठ ३ गतेबाट प्रदर्शनमा आउन लागेको फिल्म ‘जात्रै जात्रा’ को टिम हालको चर्चित रियालिटी शो ‘को बन्छ करोडपति’ मा सहभागी भएको छ । चलचित्र युनिटले प्रचारमा समेत फाइदा पुग्ने उद्देश्यले उक्त शोमा भाग लिएको हो ।

शो मा अभिनेता राजेश हमालसँग हट सिटमा बसेर अर्का दुई अभिनेता विपिन कार्की र दयाहाङ राईले भाग लिएका थिए । निर्माण टिमले उक्त शो मा भाग लिएर कति रकम जित्यो भन्ने खुलाएको छैन । किनकि, यो शो टेलिभिजनबाट प्रसारण हुन बाँकी छ ।

फिल्मका निर्देशक प्रदीप भट्टराईले यो शोबाट जितेको रकममा फिल्म टिमले थप गरेर अभिनेत्री स्वेता खड्काको स्वेता श्री फाउन्डेसनलाई हस्तान्तरण गर्ने जानकारी गराए । स्वेताले सिन्धुपाल्चोकको माझी बस्तीमा बस्ती निर्माण गरिरहेकी छिन् । सो माझी बस्तीका लागि निर्माण टिमले सहयोग हस्तान्तरण गर्न लागेको हो ।

‘जात्रा’ को सिक्वेल रहेको ‘जात्रै जात्रा’ पछिल्लो समय चर्चामा छ । यो फिल्ममा दयाहाङ राई, विपिन कार्की, रविन्द्र झा, रविन्द्र सिंह बानियाँ, राजाराम पौडेल, वर्षा राउत लगायतका कलाकारको शीर्ष भूमिका छ ।