काठमाडौँ – नेकपा एमाले निकट नेपाल खेलकुद महासंघको राष्ट्रिय भेला मंगलबार काठमाडौँमा हुने भएको छ ।

महासंघले सोमबार काठमाडौँमा पत्रकार सम्मेलन गर्दै खेलकुदको माध्यमबाट नेपालको बाम लोकतान्त्रिक आन्दोलनका आधारभूत मान्यतालाई समेत ध्यान दिई खेल क्षेत्रको विकासका लागि भेला आयोजना गरिएको जानकारी दिएको हो ।

‘खेलकुद नागरिकको मौलिक अधिकार, सम्वृद्धिका लागि जनस्वास्थ्य हाम्रो सरोकार’ भन्ने नाराका साथ भेला आयोजना गर्न लागिएको भेला संयोजक रमेश पौडेलले जानकारी दिए ।

भेलामा ७७ वटै जिल्ला तथा आबद्ध विभिन्न खेल संस्थाहरुबाट करिब १ हजार जना प्रतिनिधिहरुको उपस्थितिमा खेलकुद र यस क्षेत्रको विकासका बारेमा छलफल गरिने उनले बताए । त्यस्तै आगामी कार्यदिशासहित केही महत्वपूर्ण घोषणाका साथै नेतृत्वको समेत पुनर्गठन गरि घोषणा गरिने पौडेलले बताए ।

भेलाको मंगलबार राष्ट्रियसभा गृहमा प्रधानमन्त्री केपी शर्मा ओलीले उद्घाटन गर्ने महासंघले जनाएको छ ।