काठमाडौँ- जर्मन बुन्डेसलिगा फुटबलको दोस्रो स्थानमा रहेको आरबी लाइपजिग बराबरीमा रोकिएको छ ।

शुक्रबार राति भएको खेलमा लाइपजिग होफेनहाइमसँग गोलरहित बराबरीमा रोकिएको हो ।

घरेलु मैदानमा पाएको मौकालाई सदुपयोग गर्न नसक्दा लाइपजिगले अंक बाड्नु परेको हो ।

खेलको अन्तिम समयमा लाइपजिगका युसुफ पाउलसेनले गोल गरे पनि गोलको मान्यता पाएन । भीएआर प्रविधिमा गोल गर्नु अघि युसुफले बल हातले रोकेको देखिएको थियो  ।

बराबरीसँगै लाइपजिगले शीर्ष स्थानको बायर्न म्युनिखसँगको अंक दुरी घटाउने मौका गुमाएको छ । लाइपजिग २९ खेलमा ६१ अंकसहित दोस्रो स्थानमा रहेको छ । शीर्ष स्थानको बायर्नको ६५ अंक रहेको छ ।

होफेनहाइम ३२ अंकसहित ११औँ स्थानमा छ ।