काठमाडौँ – कर्णाली प्रदेशका मुख्यमन्त्री महेन्द्रबहादुर शाहीले प्रदेश सभा बैठकमा विश्वासको मत लिन प्रस्ताव पेश गरेका छन् ।

नेकपा माओवादी केन्द्रका संसदीय दलका नेतासमेत रहेका उनले प्रदेश सभामा बोल्दै आफूलाई विश्वासको मत दिन आग्रह गरेका छन् ।

नेपालको संविधानको धारा १८८ (२) बमोजिम प्रदेश सभाको विश्वास छ भनी विश्वास लिनको लागि वक्तव्यसहित प्रस्ताव प्रस्तुत गर्न मुख्यमन्त्री शाहीलाई सभामुखले अनुमति दिएका थिए ।

‘कर्णालीका साझा मुद्दा छन्। सबै मिलेर छलफल गरौंला,’ उनले भने, ‘सबै माननीय सदस्यहरूले मलाई एकपटक मतदान गर्नु हुनेछ भन्ने विश्वास छ ।’

उनले आफ्नो वक्तव्य प्रस्तुत गर्नेक्रममा कर्णालीको समृद्धि र विकासका लागि एकपटक फेरि साझा प्रतिवद्धता गर्नु जरूरी रहेको औंल्याए ।

‘हामीले एकताको सन्देश देशलाई दिनका लागि पनि अविश्वासको प्रस्तावलाई विश्वासको मतका रूपमा परिणत गर्नुहुने छ भन्ने मलाई अपेक्षा छ,’ मुख्यमन्त्री शाहीले संसदमा भने ।

नेकपा एमालेले मुख्यमन्त्री शाहीलाई दिएको समर्थन फिर्ता लिएपछि शाही अल्पमतमा परेका थिए ।