काठमाडौँ– नेपाल पत्रकार महासंघले तनहुँ शाखाका सदस्य तथा दमौली न्युज डटकमका सम्पादक पवन पौडेललाई नेपाली सेनाका सैनिक कमाण्डरले दुर्व्यवहार गरेको घटनाप्रति ‘गम्भीर ध्यानाकर्षण’ भएको जनाएको छ।

महासंघले विज्ञप्ति जारी गर्दै सेनाजस्तो जिम्मेवार सैनिक अधिकारीबाट पत्रकार पौडेलमाथि गरिएको हर्कत आफैँमा निन्दनीय भएको जनाएको छ ।

विज्ञप्तिमा भनिएको छ, ‘नेपाली सेनाजस्तो जिम्मेवार निकायको जिम्मेवार सैनिक अधिकारीबाट पत्रकारमाथि गरिएको यो हर्कत आफैंमा निन्दनीय र दुःखद् छ । महासंघ संविधानले सुनिश्चित गरेको पत्रकारको अधिकारमा आघत पुग्ने यस्ता कार्य नदोहोर्‍याउन र प्रेस स्वतन्त्रताको सम्मान गर्न सम्बन्धित निकायको ध्यानाकर्षण गराउँदछ ।’

वैशाख १ गते नेपाली सेनाको टोली दमौली बजारको सडकमा दौडिरहेको दृश्य खिँचेको निहुँमा व्यास-५ चापाघाटस्थित कालिभञ्जन गणका सैनिक कमाण्डरले पत्रकार पौडेललाई दुर्व्यवहार गर्दै क्यामेरा खोसेर दृश्य हटाएका थिए ।